GLEÐILEGA PÁSKA !

 

 

Já það er alveg satt, en ég hef ekki verið nógu duglegur að blogga! En það kemur til af því að ég hef verið að gera svo margt annað, sem tafið hefur mig frá því að blogga. Ég vil byrja á að óska öllum gleðilegra páska, með bestu óskum um ánægjulegar stundir með fjölskyldum sínum og ástvinum. Það er tækifæri á svona stundum eins og um jólinn að hittast og eiga samveru með fólkinu sínu. Ég hef reyndar notað tíman sem ég hef haft lausan til að vinna upp verk heima fyrir sem setið hafa á hakanum. Það eru reyndar miklu fleiri handtök eftir samt sem áður, en ég hef þó átt góðar stundir með börnunum og ástvinum, auk þess að verða að vinna, en störf mín eru þannig að þeim eru engin tímamörk sett, að undanskildu því að ég þarf á stundum að vera á ákveðnum stöðum á ákveðnum tímum. En í mínu starfi eru engin orlof, veikindi eða neinar afsakanir, það þarf að vera á 24/7 vaktinni og fjarvistir ekki teknar til greina nema "Dauði" og þá að koma með dánarvottorðið sjálfur. En það að vera til og njóta lífsins er dásamlegt og að geta unnið við það sem manni þykir gaman af eru forréttindi. Ég segi það alltaf, að ég verð ekki ríkur af mínu starfi, nema í þeim skilningi að fá öll þau tækifæri sem ég hef fengið, allt það traust sem mér hefur verið falið og öll sú reynsla sem ég hef gengið í gegnum. Það er að vera ríkur, að fá að takast á við margvísleg verkefni og geta leyst þau af kostgæfni, þannig að vel líki. Eitt af því sem fellst í því að vera fréttaljósmyndari, er að festa atburði líðandi stundar á mynd, augnablik sem aðrir fá ekki tækifæri á að upplifa öðruvísi en að sjá myndir frá þeim, sumir upplifa atburði við lestur blaða og aðrir við að horfa á þá í sjónvarpi. En forréttindi okkar er að fá að vera á staðnum og miðla til þeirra sem ekki eiga kost á öðru. Með þessu bloggi fylgja myndir frá páskavöku í Digraneskirkju á aðventu páska, sem fellst í því að kveikt er á báli fyrir utan kirkjuna undir berum himni, þar er tendrað á páskakertinu og ljósið borið í kirkjuna og viðstaddir kveikja á kertum frá páskakertinu. Eftir helgun og blessun og sálmasöng, að ógleymdri predikun sr Magnúsar Björns, þá var gengið til altaris og þáð hið heilaga sakramenti. Athöfnin var virðuleg og hátíðleg, slík athöfn gerir páskahaldið hátíðlegra, líkt og að fara til messu á jólum. Það einkennir allt starf sem fram fer í Digraneskirkju, heilagleiki en jafnframt án þess að vera yfirborðskennt, sterku mannlegu og glaðlegu yfirbragði, fullt af gáska en þó án kæruleysis. Það að vera í sókn þar sem sterkasti prestur í heimi er sóknarprestur er einnig forréttindi.

Athugasemdir

[Jón Svavarsson, 23.3.2008 kl. 21:53]

Sæll félagi þær fara á vefsíðu Digraneskirkju, ég er búin að senda sr Gunnari 47 myndir, því hér eru aðeins nokkrar, ég skal senda þér samt nokkrar.kkv Jón

sendu mér tölvupóst á [e-mail] 

[Halldór Þórðarson/dóritaxi, 23.3.2008 kl. 23:42]

Gleðilega páska félagi Jón.

[Sigrún Friðriksdóttir, 24.3.2008 kl. 00:21]

Gleðilega páska Skemmtilegra að setja það á rétta færslu.

[Halla Rut , 24.3.2008 kl. 01:00]

Fallegur pistill hjá þér. Ég er ekki trúuð sjálf en finnst samt alltaf kirkjur og kirkjuhald fallegt og það fylgir því einhver lotning. Kirkjunnar þjónar hafa haft mikið fyrir samkomunni og er því sorglegt samt að sjá hve fáir gestir eru í kirkjunni þrátt fyrir að páskar séu nú og allt það. En þannig er það nú bara, áhugi fyrir trúnni og messunni fer minnkandi með hverju árinu.

Vonandi hefur þú og þínir haft það gott um páskana.  

[Ía Jóhannsdóttir, 24.3.2008 kl. 09:29]

Mjög falleg athöfn en sárt að sjá hvað það eru fáir kirkjugestir.  Kveðja inn í daginn

[Jón Svavarsson, 24.3.2008 kl. 09:51]

Sæl öll, og takk fyrir góðar kveðjur. Það skal tekið fram að þessi atburður var á laugardagskvöldi kl 22 og það voru tæplega fjörtíu manns í þessari athöfn, sem ekkert of margir vita af en það eru sífelt fleiri sem taka þátt í þessari athöfn og almmenum guðsþjónustum og er bara gott meðaltal hvað það varðar, tala nú ekki um nú á tímum þegar framboð á alskyns afþreyjingu er jafn mikið. En hafið það öll sem best, kær kveðja

[Rúna Guðfinnsdóttir, 24.3.2008 kl. 12:19]

Skemmtilegur pistill. Já, það er sannarlega lofsvert að vinna og lifa við það sem manni finnst skemmtilegt. Það eru svo margir sem fá lítinn skerf af gleði lífsins eða möguleikum.

Gleðilega Páska!

[Herdís Sigurjónsdóttir, 25.3.2008 kl. 09:07]

Gleðilega eftirpáska

Flottar myndir félagi og gaman að sjá fyrrverandi leigusala minn í hempunni. Ég leigði íbúð í Krummahólunum af þeim Sr Gunnari og Þóru þegar þau voru fyrir Austan. Það er alltaf yndislegt að fara í kirkju. 

[Solla Guðjóns, 25.3.2008 kl. 17:02]

Hæjj og takk fyrir að velja mig sem bloggvin.Ég er búin að renna lauslega yfir myndirnar á bloggunum hér fyrir neðan sem eru bæði lýsandi og mjög góðar

[Guðjón H Finnbogason, 25.3.2008 kl. 20:26]

Þakka fyrir góðan pistil og flottar myndir Gunnar Sigurjónsson er góður við unnum vel saman ég og faðir hans á gamla Alþíðublaðinu hann auglýsingarstjóri og ég í blaðstjórn og ungliðahreyfingunni.

[Guðný Anna Arnþórsdóttir, 27.3.2008 kl. 21:57]

Frábærar myndir!

[Gunnar Sigurjónsson (IP-tala skráð) 30.3.2008 kl. 20:06]

Flottar myndir hjá þér Jón.  Það eru líka forréttindi að hafa svona mann eins og þig í sókninni.  Það verður gaman að vísa til þess í framtíðinni að þú tókst myndir af herlegheitunum þegar það var að byrja í uppsveiflunni.

Það komu reyndar yfir 2000 manns í helgihaldið yfir páskana (fermingar meðtaldar) svo ekki þarf beinlínis að kvarta.

Ég held líka að sá andblær og sú persónulega nálgun sem páskavakan býður upp á, sé ekki endilega heppileg fyrir mjög fjölmennar athafnir.  Svo 40+ er bara góð þátttaka.